2Ch 29 | Ndebele | STEP | UHezekhiya waba yinkosi eleminyaka engamatshumi amabili lanhlanu; wabusa iminyaka engamatshumi amabili lesificamunwemunye eJerusalema . Lebizo likanina lalinguAbhiya indodakazi kaZekhariya .

1 UHezekhiya waba yinkosi eleminyaka engamatshumi amabili lanhlanu; wabusa iminyaka engamatshumi amabili lesificamunwemunye eJerusalema ^a. Lebizo likanina lalinguAbhiya indodakazi kaZekhariya ^b. 2 Wasesenza okuqondileyo emehlweni eNkosi njengokwenza konke kukaDavida uyise.

3 Yena, ngomnyaka wokuqala wokubusa kwakhe ngenyanga yokuqala, wavula iminyango yendlu yeNkosi, wayilungisa ^c. 4 Wasengenisa abapristi lamaLevi, wababuthanisa egumeni elingasempumalanga. 5 Wasesithi kubo: Ngilalelani, maLevi; khathesi zingcweliseni, njalo lingcwelise indlu yeNkosi uNkulunkulu waboyihlo, likhuphe ingcekeza endaweni engcwele ^d. 6 Ngoba obaba babephambukile, benza okubi emehlweni eNkosi uNkulunkulu wethu, bayitshiya, baphendula ubuso babo bebususa endaweni yokuhlala yeNkosi ^e, bafulathela ^{▼▼ bafulathela: Heb bapha intamo.}. 7 Bavala leminyango yekhulusi, bacitsha izibane, kabatshisanga impepha, kabanikelanga umnikelo wokutshiswa kuNkulunkulu kaIsrayeli ^g endaweni engcwele. 8 Ngakho ulaka lweNkosi lwaba phezu kukaJuda leJerusalema, yabanikela evalweni ^h, ekuchithekeni, lekuncifelweni, njengoba libona ngamehlo enu ⁱ. 9 Ngoba khangelani, obaba bawile ngenkemba, lamadodana ethu lamadodakazi ethu labomkethu basekuthunjweni ngenxa yalokhu ^j. 10 Khathesi kusenhliziyweni yami ^k ukwenza isivumelwano leNkosi, uNkulunkulu kaIsrayeli, ukuze ukuvutha kolaka lwayo kuphenduke kusuke kithi ^l. 11 Madodana ami, khathesi lingonwabi, ngoba iNkosi ilikhethile ukuthi lime phambi kwayo, liyikhonze ^m, libe zinceku zayo labatshisi bempepha.

12 Asesukuma amaLevi, oMahathi indodana kaAmasayi ⁿ loJoweli indodana kaAzariya emadodaneni amaKohathi ^o; lemadodaneni kaMerari ^p oKishi indodana kaAbidi ^q loAzariya indodana kaJehaleleli ^r; lakumaGerishoni ^s oJowa indodana kaZima ^t loEdeni indodana kaJowa ^u; 13 lemadodaneni kaElizafani oShimiri loJehiyeli ^v; lemadodaneni kaAsafi oZekhariya loMathaniya ^w; 14 lemadodaneni kaHemani ^x oJehiyeli ^y loShimeyi ^z; lemadodaneni kaJeduthuni ^aa oShemaya loUziyeli ^ab. 15 Basebebuthanisa abafowabo, bazingcwelisa, beza njengomlayo wenkosi ngamazwi kaJehova ^ac, ukuhlanza indlu kaJehova ^ad. 16 Abapristi basebengena ngaphakathi kwendlu yeNkosi ukuyihlanza, bakhupha konke ukungcola abakuthola ethempelini leNkosi egumeni lendlu yeNkosi; lamaLevi akuthatha, akukhuphela esifuleni iKidroni ngaphandle ^ae. 17 Basebeqala ukungcwelisa ngolokuqala lwenyanga yokuqala, njalo ngosuku lwesificaminwembili lwenyanga bafika ekhulusini leNkosi; bangcwelisa indlu yeNkosi ngensuku eziyisificaminwembili; kwathi ngosuku lwetshumi lesithupha lwenyanga yokuqala baqeda ^af. 18 Basebengena phakathi kuHezekhiya inkosi bathi: Sesiyihlanzile yonke indlu yeNkosi, lelathi lomnikelo wokutshiswa, lezitsha zalo zonke, letafula lezinkwa zokubukiswa, lezitsha zalo zonke ^ag. 19 Lazo zonke izitsha inkosi uAhazi eyayizilahlile ekubuseni kwayo, esiphambekweni sayo, sizilungisile sazingcwelisa, khangela-ke, ziphambi kwelathi leNkosi ^ah.

20 UHezekhiya inkosi wasevuka ngovivi, wabuthanisa izinduna zomuzi, wenyukela endlini kaJehova. 21 Basebeletha amajongosi ayisikhombisa lenqama eziyisikhombisa lamawundlu ayisikhombisa ^ai lempongo eziyisikhombisa ^aj, kwaba ngumnikelo wesono sombuso lesendlu engcwele lesakoJuda ^ak. Wasesithi emadodaneni kaAroni, abapristi, akunikele phezu kwelathi leNkosi. 22 Basebehlaba izinkabi, labapristi bemukela igazi balifafaza elathini ^al; bahlaba lezinqama bafafaza igazi elathini; bahlaba lamawundlu bafafaza igazi elathini. 23 Basebesondeza impongo zomnikelo wesono phambi kwenkosi lebandla, babeka izandla zabo phezu kwazo ^am. 24 Abapristi basebezihlaba, benza ukubuyisana ngegazi lazo phezu kwelathi ukwenzela uIsrayeli wonke inhlawulo yokuthula. Ngoba inkosi yalaya: Umnikelo wokutshiswa lomnikelo wesono ngokaIsrayeli wonke ^an. 25 Wasebeka amaLevi endlini kaJehova elensimbi ezincencethayo, lezigubhu zezintambo, njalo lamachacho ^ao, njengomlayo kaDavida ^ap lokaGadi ^aq umboni wenkosi ^ar lokaNathani umprofethi ^as; ngoba lumlayo wawungesandla sikaJehova ngesandla sabaprofethi bakhe. 26 LamaLevi ema elezinto zokuhlabelela zikaDavida ^at labapristi belempondo ^au. 27 UHezekhiya waselaya ukunikela umnikelo wokutshiswa phezu kwelathi; kwathi ngesikhathi umnikelo wokutshiswa uqalisa, ingoma yeNkosi yaqalisa kanye lezimpondo ^av, langezandla zezinto zokuhlabelela zikaDavida inkosi yakoIsrayeli. 28 Lebandla lonke lakhonza, labahlabeleli bahlabelela, labakhalisi bempondo bakhalisa ^aw; konke lokhu, kwaze kwaphela umnikelo wokutshiswa. 29 Lekupheleleni kokunikela inkosi labo bonke abatholakala layo bakhothama bakhonza ^ax. 30 Khona uHezekhiya inkosi leziphathamandla bathi kumaLevi kawayidumise iNkosi ngamazwi kaDavida lakaAsafi umboni ^ay. Asedumisa kwaze kwaba yintokozo, akhothama akhonza ^az. 31 UHezekhiya wasephendula wathi: Selizehlukanisele iNkosi; sondelani lilethe imihlatshelo leminikelo yokubonga endlini yeNkosi ^ba. Ibandla laseliletha imihlatshelo leminikelo yokubonga ^bb, laye wonke olenhliziyo ekhululekileyo, iminikelo yokutshiswa ^bc. 32 Lenani leminikelo yokutshiswa ibandla elayilethayo lalizinkunzi ezingamatshumi ayisikhombisa, inqama ezilikhulu, amawundlu angamakhulu amabili; konke lokhu kwakungokomnikelo wokutshiswa eNkosini. 33 Izinto ezazingcwelisiwe kwakuzinkunzi ezingamakhulu ayisithupha lezimvu ezizinkulungwane ezintathu. 34 Kodwa abapristi babebalutshwana, okokuthi babengelakho ukuhlinza yonke iminikelo yokutshiswa; ngakho abafowabo amaLevi babancedisa ^bd waze waphela umsebenzi, labapristi baze bazingcwelisa ^be, ngoba amaLevi ayeqondile ngenhliziyo kulabapristi ukuzingcwelisa ^bf. 35 Leminikelo yokutshiswa layo yayiminengi, lamahwahwa eminikelo yokuthula ^bg kanye leminikelo yokunathwayo yeminikelo yokutshiswa ^bh. Ngokunjalo inkonzo yendlu yeNkosi yamiswa. 36 UHezekhiya labantu bonke basebethokoza ngalokho uNkulunkulu ayekulungisele abantu, ngoba into yahle yenzeka.